Villabona-Aiztondoko Hitza

Mendiko ikasgaiak

Tolosaldeko eta Leitzaldeko Hitza — Fri, 18 May 2012 04:09:46 +0000

Villabona-Zizurkilgo Jesusen Bihotza ikastolako LH2. mailako ikasleek mendi ibilaldia egiteko aukera izan zuten iragan ostiralean. Txangoan Amasa inguruetara hurbildu ziren. Bidean aurkitutako eraikinak, landareak eta animaliak ongi behatu zituzten, izan ere, orain eurei buruzko informazioa pilatu eta «lan polit bat» egitea tokatuko zaie ikasleei, irakasleen esanetan.

Landareen lilura

Tolosaldeko eta Leitzaldeko Hitza — Fri, 18 May 2012 01:29:55 +0000

30 herrialde baino gehiagotan Landareekiko Liluraren Nazioarteko I. Egunaren ospatuko da gaur. Honen harira, Fraisoro laborategian mehatxatutako landareen inguruko jardunaldia egin zuten atzo. Guztira 65 bat lagun inguru elkartu ziren bertan, norberaren esperientziak hitzaldi moduan gainontzekoekin partekatzeko. Ikerkuntzaren garrantzia azpimarratu zuten guztiek. a. imaz

Gazte Asanbladaren areto futbol txapelketa, gaur

Tolosaldeko eta Leitzaldeko Hitza — Fri, 18 May 2012 01:16:31 +0000

Gazte asanbladaren urteurrenerako prestatutako ekitaldiek aurrera jarraitzen dute. Gaur areto futbol txapelketa jokatu da 17:30etik aurrera. Bihar, hilak 19, mendi martxa egingo dute Onddo Gazte Asanbladako kideek. 11:00etan abiatuko dira plazatik mendira. 14:00etan bazkaria egingo dute berriro ere herrian, eta ondoren Mus Txapelketaren txanda izango da. Hilaren 22an, gaztetxean, El Odio filma ikusiko dute, 18:00etan, eta 23an Iruñerriko okupazioa dokumentala, ordu berean.

Kantu Eguna eta Biatloia Maiatza Saltsanen

Tolosaldeko eta Leitzaldeko Hitza — Thu, 17 May 2012 10:32:47 +0000

Maiatza Saltsan egitarauaren barruan Kantu Eguna ospatuko dute bihar, larunbata. 12:00etan Kantu Jirakoak Zizurkil goiko kaleetan ibiliko dira. 14:00etan bazkaria egingo dute zimiterioan, eta ondoren, Amalur taldearen kantu saioa eta erromeria egongo da. Hilaren 20an, igandean, Zizurkilgo XIV. Biatloia jokatuko da 10:00etatik aurrera, goiko plazan.

Haur eta familientzako berbena, bihar 18:00etan

Tolosaldeko eta Leitzaldeko Hitza — Thu, 17 May 2012 09:57:17 +0000

Kanpanolue haur eta familientzako berbena parte hartzailea antolatu dute Villabonan bihar, 18:00etatik aurrera. Antzezlana Erreboteko plazan izango da, eta euria egiten badu, Berdura plazan. Informazio gehiago ondorengo webgunean aurki daiteke: www.eidabe.com.

Begiraleen azterketa eta haurrentzako udalekuak

Tolosaldeko eta Leitzaldeko Hitza — Thu, 17 May 2012 09:50:30 +0000

Oporretan Euskarazerako begiraleen azterketa hilaren 26ean egingo dute Atxulondon, 10:00etan. Euskararen erabilera sustatzeko antolatu diren udalekuetan, haurrek izena emateko epea zabalik dute, ekainaren 15a bitarte. Horretarako, Zizurkilgo udal bulegoetara joan behar da, edo 943 69 24 95ra deitu.

Ostatua hartzeko aukera berria ireki du udalak

Tolosaldeko eta Leitzaldeko Hitza — Thu, 17 May 2012 09:37:08 +0000

Herri Ostatuaren errentamendu eta ustiapenaren lehiaketa esleitzeko prozedura hutsik gelditu dela jakinarazi du Larraulgo Udalak, inor ez delako aurkeztu. Horregatik, prozedura berriro irekitzea erabaki dute, hilaren 31ra arte bitarte. Zerbitzua hartu nahi duenak, Larraulgo udaletxean izena eman beharko dute. Zalantzak argitzeko 943 69 30 42 telefono zenbakira deitu behar da.

Martin Garitano ahaldun nagusiak bat egin du Larraulgo eskola txikiarekin

Villabona-Aiztondoko Hitza — Thu, 17 May 2012 05:20:04 +0000

Larraulgo herriak Martin Garitano Gipuzkoako ahaldun nagusiaren eta Zigor Etxeburua Euskara zuzendariaren bisita izan zuen, atzo. Bertatik bertara, herriko eskola txikiaren egoeraren berri jaso nahi izan zuten.

Udaletxearen aurrean egin zioten harrera

Martin Garitanok Larraulgo eskolari bere babesa adierazi zion, eta «Gipuzkoak herri txiki asko ditu, eta beharrezkoa da hauek garatzea», esan zuen. «Eskolak dira herri hauen bihotza», gaineratu zuen. Horregatik, «Eusko Jaurlaritzako Hezkuntza arduradunei eskatzen diet Larraulen 12 urtera arteko zerbitzua eman dezatela», esan zuen.

Udaletxe aurrean harrera egin ostean, lehenik eta behin, haur eskola eta eskola txikia ezagutu zituzten. Bertako haurrekin eta irakasleekin hitz egiteko aukera izan zuten. Nola lan egiten duten, eta zein arazo dituzten argitu zizkieten, eta jarraian, bilera bat izan zuten eskolaren egoeraz .
Xabier Mujika Larraulgo alkateak, ahaldun nagusiak bileran azaldutako babesa eta Larraulgo eskola sustatzeko konpromisoa eskertu zituen. «Egun 8 urtera arteko eskola zerbitzua izanagatik, udalak eta guraso elkarteak legeak eskatzen dituen baldintza guztiak betetzen dituztenez, 12 urte arteko zerbitzua herrian izan bitartean lanean jarraituko dugu», adierazi zuen.

Ikasleekin egon zen Garitano

Mikel Olano Gipuzkoako Eskola Txikietako Gurasoen Koordinakundeko lehendakariak, Gipuzkoako eskola txikiek foru aldundiaren babesa sentitzen dutela nabarmendu zuen, eta eskola txikiek herrian duten garrantzia adierazi zuen: «Heziketa emateaz gain, herri proiektua dira, eta herri txikien bizi iraupenerako elementu nagusi dira».

Eskolako ikasle, irakasle eta gurasoekin

Zigor Etxeburuak, berriz, herri txikiek euskarari egiten dioten ekarpena azpimarratu nahi izan zuen: «Herri eta eskola txikietan egiten ari diren ahalegina guztiz funtsezkoa da euskararen jarraipenerako eta euskarak bizirik irauteko».
Murgil Guraso Elkartearen izenean, Estitxu Eizagirrek hitz egin zuen: «Eusko Jaurlaritzak Eskola Txikien Festa egiteko urtero eman izan duen diru laguntza aurten ukatu egin du, eta kolokan jarri zuen aurtengo festa. Baina, Gipuzkoako Aldundiaren, urteroko beste hainbat eragileren, eta Asteasuko zein Larraulgo enpresen babesagatik posible izango da ekainaren 3ko festa, eta hau 25. urteurrenak merezi bezalakoa izatea».
Zortzi urte arteko zerbitzua dute herrian, eta ikasturte berria hasi aurretik, Hezkuntza sailarekin bildu nahi dute, zerbitzua beste ikasturte batez luzatzeko. Hamabi urtera artekoa lortu bitartean lanean jarraituko dute. Egun 15 ikasle ditu Larraulgo eskolak.

Asteasuko ikastetxeko haurrek krisiaren inguruko lipdub-a egin dute

Tolosaldeko eta Leitzaldeko Hitza — Wed, 16 May 2012 14:07:46 +0000

Martin Garitano Ahaldun Nagusiak bat egin du Larraulgo eskola txikiarekin

Villabona-Aiztondoko Hitza — Wed, 16 May 2012 12:10:29 +0000

Larraulgo eskola txikia ezagutu ondoren, udaletxean bilera egin du Martin Garitano Ahaldun Nagusiak Larraulgo udal ordezkari eta guraso elkarteko kideekin. Zigor Etxeburua Euskara zuzendaria ere bertan izan da.