Villabona-Aiztondoko Hitza » Larraul

Eskola txikiak aldarrikatuz

Tolosaldeko eta Leitzaldeko Hitza — Fri, 27 Jan 2012 06:14:49 +0000

Ekainaren 3an izango da eskola txikien festa Larraulen. Aurten 25 urte beteko dira, Bidegoianen lehen festa egin zenetik. Eskola txikiak bizirik lelopean egin zen festa hura, eta oraindik ere, aldarrikapen berberarekin jarraitzen dute Gipuzkoako herri eta auzoetako eskola txikiek.

Astelehenean Ikaztegietako Herri Eskolan egin zuten grabaketa

Azken bost edo sei urteak oso mugituak izan dituzte Larraul herrian. Lan handia egin behar izan dute dena hasieratik antolatzeko: eskolaren irekiera, guraso elkartearen sorrera, zaintza-zerbitzua, bilerak eta negoziazioak Hezkuntza sailarekin…
Legearen arabera, eta duten haur kopurua kontuan hartuta, larrauldarrei eskola propioa dagokie. Gaur egun, ordea, oraindik ez diete onartu eskola propioa izateko duten eskubidea, eta Asteasuko Pello Errota eskolaren gela balitz bezala funtzionatzen dute. Beraien ekarpena, eskola txikien mugimenduari, festa antolatzearen ardura hartuz izango da. Guzti honen aurrean, eta eskola txikien mugimenduari mesede egin nahian, festa antolatzearen ardura hartu zuten.
Era berean, beraien egoeraren berri eman nahi dute. Pasa den urteko ekainean, Abaltzisketako Txalburu eskolari hartu zion lekukoa Larraulek.
Ez dute etsi, eta gaur egun herrian duten zerbitzua handitu nahi dute. Haur eskolaz gain, hiru gela dituzte. Eskola txikien ezaugarria den adin aniztasuna ematen da geletan, eta urtetik urtera haur gehiago dituzte.
Eskola txikiaren festa antolatzen hasiak daude. Guraso elkarteko kideak hainbat arlotan banatuta lanean ari dira: Ekonomia, ikuskizunak, komunikazioa, salmenta, trafikoa eta zerbitzuak bereiztu dituzte, eta martxa onean doaz prestaketa lanak.
Zerotik sortutako eskola
Eskola txikiaren kontuarekin, Larraulen zerotik hasi dira. Eskola egon zen, baina hainbat urtez larrauldarrek hezkuntza ezin izan dute herrian jaso. Ezerezetik hasi behar izan dute, eta zenbait momentutan Eskola Txikien inguruan ezjakintasun eta gaizki ulertze handia zegoen.
Eta zerbait egiteko beharra sentitzen zuten, eskola txikien hezkuntza eredua behar bezala ulertzeko eta prestigiatzeko. Bai eskola txikien mugimenduan, eta baita eskola txikien mugimendutik haratago ere.
Larraulgoa eskola txikien mapan jarri nahi dute. Eta besteak beste, azken urteetako lana irudikatu asmoz, ikus-entzuneko bat grabatzeko ideia izan dute buruan.

Iñaki Alcalde, Larraulgo guraso elkarteko kidea

«Gure ekarpena festa antolatzea eta dokumentala egitea izango da»

Iñaki Alcalde (Lasarte-Oria, 1973) Larraulgo Guraso Elkarteko beste kide batzuekin batera, eskola txikien izaera erakutsi nahi duen ikus-entzunekoa grabatzen ari da. Ikus-entzunezkoaren helburua eskola txikien hezkuntza ereduaren aukeren berri eman eta zabaltzea da.
Ideia bururatu, eta eskola txikien inguruko ikus-entzunekoa grabatzen ari zarete.
Ikus-entzunezkoaren ideia Larraulen sortu zen eta Eskola Txikien Guraso Elkartearen Koordinakundean aurkeztu genuenean oso ondo ikusi zuten. Zuzendaritzako kideak 2012. urterako hainbat ekimen antolatzen ari ziren, eskola txikien festaren 25. urteurrena ospatzeko, eta dokumentala ospakizun horien barruan kokatzen da.
Ideia izatetik egitera pauso handia dago. Nolakoa izan da bidea?
Ikus-entzunezkoa hasieratik lantalde pluralean landu da: irakasle, guraso eta udal ordezkariek izan dira. Pasa den urteko uztaila eta iraila bitartean hamar bat laguneko taldea elkartu ginen: koordinadorako aitzindariak diren Gloria Castaños eta Brixi Arrue; gaur egungo zuzendaritzakideak diren Mikel Olano eta Irati Aldazabal; irakasleen koordinatzailea den Arantxa Oliden eta udal ordezkarietatik Jexux Murua eta Iker Otamendi. Larraulgo guraso batzuek ere parte hartu zuten. Bakoitzaren buruan ideia ezberdin bat zegoen, eta aukera horien artean, nolabait zein dokumental mota egin nahi genuen definitu genuen.
Lan talde horretan zer erabaki zen?
Ideia jasa horretan argi geratu zen dokumentalak hiru hanka eduki behar zituela: eskolaren barruan gertatzen dena, hau da, irakasleen eta ikasleen arteko elkarlana; guraso elkarteen inplikazioa eta udalen partaidetza egongo litzateke.
Zer jaso edo adierazi nahi duzue dokumentalarekin?
Egungo mugimenduari argazkia atera nahi diogu. Hezkuntza eredu gisa prestigiatzea; mugimenduari lotutako sentimendua bultzatu eta indartzea; komunitate osoaren inplikazioa beharrezkoa da, hau da, ikasle, guraso, irakasle, udalerri,… guztiak beharrezkoak dira. Horretarako 27 eskolen artetik erreferente onak bilatzen ahalegindu gara.
Larraulgo gurasoak ari zarete lanean, ezta?
Aurten gure ekarpena bi mailatan emango dugu; alde batetik, festa antolatuz eta bestetik, dokumentala eginez.
Noiz hasi zineten grabaketekin?
Irailean hasi ginen grabaketekin eta otsaila alderako bukatuko dugu. Grabazioen azken ukituak egiten ari gara, eta jarraian muntaiaren fasean sartuko gara.
Noiz aurkeztuko duzue?
Aurreikuspenen arabera, maiatzean festarekin batera aurkeztuko da, baina helburua festa egunean proiektatzea izango da.
Zein herritan egon zarete?
Berrobin, Altzon, Gabirian, Zerainen, Olaberrian, Ikaztegietan, Larraulen, Bergarako Angiozar auzoan eta Igeldon egon gara. Herriez gain auzoen kasuistika ere hartu nahi genituen, eta beraien izaera ere sartu nahi izan dugu.
Eta finantziazioa nola dago?
Koordinakundetik bideratu da, eta udalei eskatu zaie laguntza dokumentala egin ahal izateko.

Jexux Mari Irazuk seigarren postua lortu du finalean

Villabona-Aiztondoko Hitza — Mon, 19 Dec 2011 11:00:13 +0000

Illunbe jendez bete zen atzokoan. Oholtza gainean, zortzi bertsolari eta txapela Aitor Sarriegik jantzi du. Udaberrian hasi zen Gpuntua txapelketa amaierara iritsi da, eta Jexux Mari Irazuk seigarren postua eskuratu du.

Aitor Sarriegi eta Beñat Gaztelumendi pasa ziren buruz-burukora.

Sarriegik 1.051 puntu lortu ditu, eta Gaztelumendik 1.045. Jexux Mari Irazu larrauldarra seigarren geratu da. Hona hemen sailkapena:

1. Aitor Sarriegi …. 1.051 puntu
2. Beñat Gaztelumendi …. 1.045 puntu
3. Alaia Martin …. 594 puntu
4. Iñaki Apalategi …. 590 puntu
5. Agin Rezola …. 588,5 puntu
6. Jexux Mari Irazu …. 578 puntu
7. Jon Martin …. 577 puntu
8. Unai Agirre …. 572 puntu

Jexux Mari Irazuk zazpi aurkari izango ditu txapelaren lehian

Tolosaldeko eta Leitzaldeko Hitza — Fri, 16 Dec 2011 06:49:43 +0000

Jexux Mari Irazu Gipuzkoako Bertsolari Txapelketaren finalean egongo da hilaren 18an, etzi, Donostiako Illunben. G puntuan parte hartu duten bertsolari guztien artetik, zortzi onenak iritsi dira azken geltokira. Finaleko trena 16:30etik aurrera abiatuko da, eta aurrez inork Gipuzkoako txapela ez duela jantzi aipatu behar da.
Hiru finalaurrekoak kontuan hartzen baldin badira, Jexux Mari Irazu larrauldarra izan da puntu gehien lortu dituena. Hala eta guztiz ere, horrek ez du esan nahi faboritoa izango denik, beste zazpiek ere maila altua erakutsi baitute txapelketa guztian zehar. Azken saio honetan, larrauldarra izango da beteranoena.
Finalean, beraz, ondorengo zortzi bertsolariak egongo dira igandean: Jexux Mari Irazu, Aitor Sarriegi, Beñat Gaztelumendi, Unai Agirre, Agin Rezola, Alaia Martin, Iñaki Apalategi eta Jon Martin.
Donostiako Illunben 10.000 bertsozale elkartuko dira finala zuzenean jarraitzeko asmoz. Sarrerak erosteko aukera oraindik ez da agortu, bertsosarrerak.eu web gunean.
Gipuzkoako Bertsolari Txapelketaren finala 16:30ean hasiko baldin bada ere, Illunbeko ateak 15:00etan zabalduko dituzte. Ordu t’erdiko tarte horretan, antolatzaileek hainbat ekitaldi antolatu dituzte giroa berotzeko.

Martin Arizetaren idiek erakustaldia egin dute kultur astean

Tolosaldeko eta Leitzaldeko Hitza — Sat, 26 Nov 2011 16:19:11 +0000

Larraulgo kultur astearen barruan, Martin Arizetaren idi pareak erakustaldia egin du. San Bartolome egunean egitekoa zen idi proba bertan behera eratu zen orduan, eguraldi txarra zela eta. Kultur astean egitea pentsatu zuten, eta gaurkoan eguraldiak lagundu du.

Jexux Mari Irazu: “Finalera iristea da nire helburua eta ilusioa”

Villabona-Aiztondoko Hitza — Thu, 24 Nov 2011 14:16:51 +0000

Finalaurreko saiora indartsu iritsi da Jexux Mari Irazu (1972, Larraul). Gipuzkoako Txapelketa final laurdenetan hasi zen berarentzat, eta Oñatiko saio hartan, puntu gehien lortu zituen bertsolaria izan zen.
Final laurdenak pasa zenituen bezala pasata, nola aurkitzen zara orain?
Oraingoz lasai. Ardura handiena agian aurreko saioan nuen. Euskal Herriko Txapelketarako txartelak orduan erabakitzen ziren, eta kanpoan geldituz gero, hemendik bi urtetara egingo den txapelketa horri agur esan beharko nion. Nire adina ikusita, agian txapelketen amaiera izango zen. Alde horretatik, beraz, pixka bat lasaiago aurkitzen naiz; gogoarekin eta finalera pasatzeko ilusioarekin.
Txapelketa honi zein helbururekin ekin zenion?
Gipuzkoako Txapelketan parte hartu dudan guztietan finalera iritsi naiz. Euskal Herrikorako aukera hori hor zegoen, baina helburua finalera iristea zen.
Eta horretarako zer egin beharra dago?
Saio ona, erregularra, eta ez erori; normalean txapelketa guztietan egin behar izaten den bezala.
Kartzelako lanarekin hasiko da saioa; arraroa.
Antolakuntza taldeak esperimentu moduan planteatu dituzte gauza batzuk, eta nire ustez horretarako leku onena ez da txapelketa bat. Ikusiko da nola ateratzen den.
Zer iruditzen zaizu Usabal?
Kantatzeko leku oso polita iruditzen zait. Ea jendeak erantzun eta giro polita egoten den.

Bakarka
Nerea Elustondo: «Aurtengo errebelazioa izan dena eta izan litekeena».
Beñat Lizaso: «Aitaren semea».
Unai Agirre: «Lagun handi bat eta finalerako kandidatu nahiko segurua».
Aitor Sarriegi: «Txapelketako kandidatuetako bat eta azeleradorea ondo zapaltzen dakiena».
Iñigo Izagirre: «Jenio puntu bat duena, eta agian oraindik dena erakutsi ez duena».
Jexux Mari Irazu: «Igandean besteek bezalaxe ahal duena egingo duena».

Bertso bazkarirako txartelak erosteko epea gaur amaitzen da

Tolosaldeko eta Leitzaldeko Hitza — Wed, 23 Nov 2011 06:44:17 +0000

Kultur Astea 2011 astelehenean hasi zen. Gaur, 19:30ean, Ander Leonek hitzaldia eskainiko du kultur etxean. Gaia ondorengoa izango da: Emakumeekiko errepresioa frankismoan. Saturrarango adibidea. Horrez gain, gaur amaituko da larunbatean izango den bertso bazkarirako txartelak erosteko epea. Horretarako, 21:00ak baino lehen, herriko elkartera edo ostatura joan beharko da txartelak erostera. Hilaren 26an, Aitor Mendizabal eta Amaia Agirre ariko dira bertsotan Larraulen.
Biharko egunari dagokionez, sagardo dastatze komentatua egingo dute Katillu-Txulo elkartean, Sagardo Elkartearen eskutik. Ostiraletik aurrerako ekitaldiak, azkenik, egun guztian zehar banatu dituzte.

Hemezortzi lanpostu betetzeko langileak behar dituzte

Tolosaldeko eta Leitzaldeko Hitza — Tue, 22 Nov 2011 14:14:26 +0000

Adunako, Alkizako, Larraulgo eta Zizurkilgo udalek, eta Aiztondo Mankomunitateak berak, langileak kontratatu behar dituzte aldi baterako.
Guztira hemezortzi lanpostu izango direla azaldu dute: Ingurumen langilea, peoiak, ofizialak, gizarte langileak, administraria, gizarte eta kultur dinamizatzailea… Lan eskaintzako postuen ezaugarriak eta baldintzak ikusteko informazio osatua www.lanbide.net web-orrian jarri dute.
Beharrezko baldintzetako bat, Lanbiden izena emanda egotea da, eta kotizaziopeko prestaziorik ez jasotzea edota diru-sarrera bermatzeko errenta jasotzea.
Izena emateko modua: Lanbideko bulegoan edo www.lanbide.net web-orrian aurki daiteke.
Izena emateko epea: azaroaren 17an zabaldu zuten, eta abenduaren 1era bitartean egongo da.
Hemezortzi lanpostu hauek betetzeko garaian, udaletatik eta mankomunitatetik azaldu dutenez, «lehentasuna Aiztondo Mankomunitatea osatzen duten herrietan erroldatutakoek izango dute; hau da, Adunan, Alkizan, Larraulen eta Zizurkilen erroldatutakoek».

Zazpi eguneko kultur egitaraua antolatu dute

Tolosaldeko eta Leitzaldeko Hitza — Wed, 16 Nov 2011 08:33:01 +0000

Larraulgo Kultur Batzordeak Kultur Aste bete-betea osatu du hurrengo asterako. Zazpi egun ekitaldiz janztea lortu dute, atseden egunik utzi gabe. Hainbat egunetan gainera, ekitaldi bat baino gehiago egongo dira.
Azaroaren 21etik 27ra, hitzaldiak, erakusketak, bertsoak… egongo dira. Kultur Asteari hasiera argazki diaporamarekin emango diote, baserriko tresneriei buruzko erakusketarekin jarraituz.
Azaroaren 26an, larunbatean, bertso bazkaria egongo da Jon Maia eta Aitor Mendiluzerekin. Txartela erosteko epea hilaren 23an, asteazkenean, amaitzen dela azaldu dute antolatzaileek.

Egitaraua
Azaroak 21, astelehena
18:30ean. Larraulgo argazki diaporama kultur etxean.
19:30ean. Baserriko lanabesei buruzko 15 eskulturen erakusketaren inaugurazioa, museoan.
Azaroak 22, asteartea
19:30ean. Gari-Lanak Errezilen, hitzaldia eta dokumental emanaldia. Atala Kultur Taldearen eskutik, kultur etxean.
Azaroak 23, asteazkena
19:30ean. Emakumeekiko errepresioa Frankismoan. Saturrarango adibidea. Hitzaldia, Ander Leonen eskutik, kultur etxean.
Azaroak 24, osteguna
19:00etan. Sagardo dastaketa komentatua, Sagardo Elkartearen eskutik. Katillu- Txulo elkartean.
Azaroak 25, ostirala
17:00etan. Umeentzako merienda.
Ondoren. Eskulanak, Katillu-Txulo elkartean.
18:30ean. Larraul 2012 Eskola Txikien Festaren herri aurkezpena.
19:30ean. Hernaniko Ozenki abesbatzaren emanaldia, musika tresnen laguntzarekin, San Esteban elizan.
22:00etan. Mus txapelketa Katillu-Txulo elkartean.
Azaroak 26, Larunbata
12:00etan. Idi proben erakustaldia.
14:00etan. Bertso bazkaria Aitor Mendiluze eta Jon Maia bertsolariekin. Izena emateko elkartean edo Herriko Ostatuan. Epea, azaroak 23 Asteazkena, 21:00etan.
16:30-18:00. Erakusketa museoan, Larraulgo egutegiko argazkien aukeraketa.
18:00etan. Untxi Belarriak ipuina, Lupe Lekuona ipuin kontalariaren eskutik, kultur etxe-an.
Azaroak 27, igandea
10:00etan. Mendi irteera herria ezagutuz.
16:00etan. Pilota partidak frontoian.
16:30-18:00. Erakusketa museoan, Larraulgo egutegiko argazkien aukeraketa.
18:00etan. Talo eta gaztaina jatea Katillu-Txulo elkartean.

Jubilatuentzat Gernikako feriara joateko irteera antolatu dute

Villabona-Aiztondoko Hitza — Thu, 13 Oct 2011 15:56:48 +0000

Aiztondo Zerbitzuen Mankomunitateak jubilatuentzako irteera antolatu du. Gernikako urriko azken feria egunera joateko aukera izango dute Larraul, Alkiza, Zizurkil eta Aduna herrietako jubilatuek.
Hilaren 31n izango da azoka, eta goiza feria ikusteko baliatuko dute. Bertako jai giroan murgilduko dira. Bazkaltzera, ordea, Mendatako aterpe-jatetxera joango dira. Menua aukeran izango dute: babarrunak bere sakramentuekin edo menestra; bakailaoa piperrekin, entrekota, postrea eta kafea. Bazkalostean, arratsaldea libre izango dute.

Autobusa herriz herri
Autobusa 07:00etan aterako da Larraulgo plazatik, eta 07:15ean Alkizan zain daudenak hartuko ditu. Ondoren, 07:30erako Zizurkil Gora joango da, eta bertatik Adunarako bidea hartuko du 07:45erak bertan egoteko.
Irteerara joateko izena eman behar da, eta azken eguna hilaren 17a, astelehena, izango da. Aiztondo Zerbitzuetako 943 69 39 30 telefono zenbakira deitu behar da. Eta izena ematen duenak 30 euro ordaindu beharko ditu.

Mihiluze programara joateko aukera dago

Villabona-Aiztondoko Hitza — Thu, 13 Oct 2011 15:53:56 +0000

Larraulgo Udalak, Euskal Telebistak egiten duen Mihiluze programara joateko aukera eskaintzen du. 16 urtetik hasi, eta 80 urtera bitartekoei zuzendua dago. Abenduaren 14ean izango da grabaketa, 13:00etatik 18:30era. 14:00etan aperitiboa izango da. Hilaren 19a baino lehen izena eman beharko da 943 69 39 30 telefono zenbakira deituz.