Villabona-Aiztondoko Hitza » Asteasu

Asteasun, Villabonan eta Zizurkilen inauteriak

Tolosaldeko eta Leitzaldeko Hitza — Wed, 15 Feb 2012 04:06:19 +0000

Urteroko ohiturari jarraituz, Asteasun inauteri jaia egingo dute etzi, hilaren 17an. Haurrak sorgin mozorroekin irtengo dira kalera, eta dantza egingo dute Lamitegin, su baten inguruan. 16:15ean, eskola amaituta, kalejira bat egingo dute herrian barrena. Zezen suzkoa eurekin ibiliko dute, eta Alfredok parrilla jaitsiko du oilasko batzuk erretzeko. Antolatzaile lanetan dabiltzan guraso taldeak, herritar guztiak animatu ditu inauteri jaira.
Jesusen Bihotzakoen jaia
Villabona eta Zizurkilgo Jesusen Bihotza Ikastolak ere inauteri jaia antolatu du, herritar guztiei zabaldua. Villabonan Ostegun Gizenean egingo dute festa, udaletxe aurrean emanaldia eskainiz eta herri guztian zehar kalejira eginaz, eta Zizurkilen, Ostiral Mehean. Kasu honetan, lehenbizi desfilea egingo dute, eta ondoren, plazan, emanaldia. Villabonako Ikastolakoak estralurtarrez mozorrotuko dira, eta Zizurkilekoak margolariz. Bi herrietako udalak ere jaiarekin bat egin dutela azaldu dute ikastolatik. desfilea izango da lehendabizi eta bukatzeko emanaldia plazan.

Myriam Ulangaren organo kontzertua izango da

Villabona-Aiztondoko Hitza — Wed, 21 Dec 2011 12:42:11 +0000

Ostiralean, hilak 23, 19:00etan Miryam Ulanga organo jotzaileak kontzertua eskainiko du Asteasuko San Pedro elizan. Besteak beste, Sonatina dalla Cantata 106, Toccata y fuga en re menor, Toccata, Variacioens sobre un tema vasco eta Suite Jazzique entzuteko aukera izango da. Bach, Dubois edo Guridi maisuen doinuez gozatzeko aukera izango da.

Miryam Ulanga Andoaingo Udal Musika eskolako piano irakaslea da. Kontzertu asko eskaini ditu bai bakarlari bezala, eta baita errepertorista bezala ere.

Jostailuen trukea egin dute Asteasuko haurrek

Villabona-Aiztondoko Hitza — Sat, 17 Dec 2011 17:28:44 +0000

Asteasuko I. Jostailuen Truke Eguna egin dute gaur goizean pilotalekuan. Lehenengo, eraman dituzten jostailuak sailkatu dituzte hiru mahai ezberdinetan sailkatuz. Era berean, jostailuak eraman dituenari truke egin ahal izateko txartela eman diote.

Egoera onean dauden jostailuak eraman behar izan dituzte. Behin haur guztiek txartela eskuan zutela, banan bana, beste jostailu bat aukeratu behar izan dute.

Haurrak eta gurasoak elkartu dira truke egunean.

Morauren kontzertua eta I. Jostailuen Truke Eguna izango dira, asteburuan

Villabona-Aiztondoko Hitza — Wed, 14 Dec 2011 12:55:00 +0000

Asteasun, kultura talde berria sortu dute herriari bizia emateko helburuarekin. Asteburu honetarako bi ekitaldi antolatu dituzte: alde batetik, Andoni Tolosa Morauren kontzertua, eta bestetik, Asteasuko I. Jostailuen Truke Eguna.

Kontzertua, ostiralean, hilaren 16ean izango da Iturriondo tabernan. 20:30ean hasiko da, eta doan izango da. Euskal kantagintza Berriaren historia laburra egingo du.

Larunbat eguerdian berriz, Asteasuko I. Jostailuen Truke Eguna egingo dute. Jostailuak, 11:30etik 12:00etara eraman beharko dira, eta trukatzeko ordua, 12:30etik 13:00etara izango da.

Egoera onean dauden jostailuak eraman beharko dira, eta hiru koloreren arabera sailkatuko dituzte: jostailuak (mahai jolasak, kotxe kapotak, informatika materiala,…); kirol materiala (patinak, palak, kaskoak,…) eta jostailu txikiak (panpinak, kotxe txikiak,…)

Jostailua eramaten duenari txartela banatuko zaio pegatina batekin, eta txartelaren kolorearen arabera sailkatutako jostailuetako bat hartuko du.

Egoitz Murgoitiok Sven Nysen mozorroa jantzita irabazi du

Tolosaldeko eta Leitzaldeko Hitza — Wed, 07 Dec 2011 10:25:02 +0000

Egoitz Murgoitiok izugarrizko erakustaldia eman zuen atzo Eizmendi auzoan, XIII. Asteasuko Nazioarteko Ziklo Kros proban. Sven Nys handiak leku berean egin ohi izan zuen bezala, hasieratik utzi zituen aurkari guztiak atzean abadiñoarrak. Bigarren itzulirako, bigarrenari minutu bateko aldea ateratzen zion. Amaiera aldean, erritmoa jaistea erabaki zuen Murgoitiok, eta Aitor Hernandezi ia bi minutuko aldea atera zion helmugan.
Asteasuko proba 10:00etan hasi zen, kadeteen lehiarekin. Ikusleak pixkana-pixkana hasi ziren gerturatzen Eizmendi ingurura, eta denek krisia edo nazioarteko izar handien hutsunea zuten buruan. Ibilbideak, ordea, lokatza erakusten zuen, eta hori ziklo krosean ikuskizuna da. Goizeko euri tantak eguzki zertzelada bilakatu ziren eguerdian, elite mailako proba jokatzen ari zirenean. Une horretan, ibilbidearekin erabat bat eginda, txirrindulari bakarra zebilela zirudien: Egoitz Murgoitio. Aurreko urteetako atzerritarren erakustaldien pareko lasterketa egiten ari zen 28 urteko euskalduna: bihurguneetan segurutik joaz, eta zuzen guneetan izugarrizko indarra erakutsiaz. Ikusgarria benetan bihurgunetik atera eta lehen pedalkadetan erakusten zuen indarra. Egoitz Murgoitiok ikastaroa eskaini zuen Asteasun, eta gaia ziklo krosaz nola gozatu zen.
Lasterka amaieran esker oneko hitza izan zituen abadiñoarrak: «Lasterketa oso ona da Asteasukoa, eta zirkuitua bikaina da. Aurrekontuekin lasterketa guztiak arazoak izaten ari dira, baina hemen antolakuntzak kalitatea mantentzea lortu du, esfortzu handi batekin; ikusleei eta antolatzaileei eskerrak eman behar zaizkiela uste dut». Berak egindako lanarekin, «gustura» agertu zen txapelduna: «Lokatzarekin karrera onak egin izan ohi ditut, eta pixka bat harrituta ere banago ematen ari naizen mailarekin».
Antolatzaileak, Aitzondo Txirrindulari Elkarteko kideak, gustura zeuden atzoko ikuskizunarekin. Hala eta guztiz ere, etorkizunean lasterketak zein itsura hartuko duen ez dakite ziur.

Sailkapenak
Elite mutilak
1. Egoitz Murgoitio
2. Aitor Hernandiz +1:55
3. Jose Antonio Hermida +2:18
4. Javier Ruiz de Larrinaga+2:55
23 urte azpikoak
1. Jonathan Lastras
2. Pablo Rodriguez
3. Alberto Sainz
Elite neskak
1. Olatz Odriozola
2. Lucia Gonzalez
3. Amaia Martiola
Junior neskak
1. Eider Merino
2. Lierni Lekuona
3. Ruth Telleria
Junior mutilak
1. Jaime Campo
2. Jose Manuel Ribera
3. Xabier Goikoetxea
Kadete neskak
1. Arantza Villa
2. Izaro Iraolagoitia
3. Yaiza Agirre
Kadete mutilak
1. Gotzon Martin
2. Patxi Aldanondo
3. Daniel Maiora
Masterrak
30 URTETIK GORA
1. David Busto
40. URTETIK GORA
1. Ruiz de Arkaute
50 URTETIK GORA
1. Jose Antonio Mazaira.

Sustraietara itzuliko da bihar jokatuko den Asteasuko Nazioarteko Ziklo Kros Txapelketa

Tolosaldeko eta Leitzaldeko Hitza — Mon, 05 Dec 2011 14:31:14 +0000

Aiztondo Txirrindulari Elkarteak erabaki garrantzitsu bat hartu behar izan du biharko ziklo kros proba antolatzerako garaian: aurreko urteetako maila mantendu; izar distiratsuenak ekarriz, edo probaren etorkizuna bermatu; maila xumeago batean. Bigarren aukeraren aldeko apustua egin dutenez, aurten, Asteasuko Nazioarteko Ziklo Kros Txapelketan, ez dira nazioarteko txirrindulari onenak egongo. Hala eta guztiz ere, maila goreneko proba izaten jarraituko du, nazioarteko egutegiaren barruan.
Antolatzaileek azken egunetan azaldu dutenez, krisiaren eragina gogor jasan behar izan dute: «45.000 euro inguruko aurrekontu bat izatetik, 12.000 euro izatera pasatu gara». Dirua biltzeko garaian arazoak izan dituzte, eta beherakadak alde guztietatik etorri zaizkie, bai instituzioetatik eta baita arlo pribatutik ere. Zerbait estutzen hasita, nahiago izan dute diru iturriak lasai utzi eta aurrekontua jaitsi.
Aiztondotik azaldu dutenez, aurten ere eskaintza ugari jaso dituzte txirrindularien aldetik, hona etortzeko prestutasuna agertuz. Egoera ekonomikoa kontuan hartuta ordea, ezezkoa eman beharrean suertatu dira, eta ondorioz, nazioarteko txirrindulariak egongo diren arren, Sven Nys, Niels Albert edo Stybar adibidez ez dira etorriko. Euskal Telebistak ere ez du proba zuzenean botako.
Aurrera begira, «ilusioz»
Garai gogorrak bizi arren, antolakuntzak etorkizunari «ilusioz» begiratu nahi dio: «Betiko ilusioarekin jarraitzen dugu, eta etorkizunean, Asteasuko proba berriro ere lasterketa garrantzitsu bat izatea nahiko genuke».
Aurtengoan beraz, sustraietara itzuliko dira, duela 13 urteko probara: «Euskadi mailako proba bat antolatzen hasi ginen orduan, gero maila handitzen joan zen eta munduko onenak Asteasura ekartzea lortu izan dugu. Hala eta guztiz ere, Gipuzkoako ziklo krosarentzat garrantzitsuena proba bera mantentzea dela uste dugu».
Zaleek beraz, biharko lasterketaren nondik norakoak ikusita, inoiz baino zita garrantzitsuagoa dute Asteasuko Eizmendi auzoan, 10:00etatik aurrera.

Hemezortzi lanpostu betetzeko langileak behar dituzte

Tolosaldeko eta Leitzaldeko Hitza — Tue, 22 Nov 2011 14:14:26 +0000

Adunako, Alkizako, Larraulgo eta Zizurkilgo udalek, eta Aiztondo Mankomunitateak berak, langileak kontratatu behar dituzte aldi baterako.
Guztira hemezortzi lanpostu izango direla azaldu dute: Ingurumen langilea, peoiak, ofizialak, gizarte langileak, administraria, gizarte eta kultur dinamizatzailea… Lan eskaintzako postuen ezaugarriak eta baldintzak ikusteko informazio osatua www.lanbide.net web-orrian jarri dute.
Beharrezko baldintzetako bat, Lanbiden izena emanda egotea da, eta kotizaziopeko prestaziorik ez jasotzea edota diru-sarrera bermatzeko errenta jasotzea.
Izena emateko modua: Lanbideko bulegoan edo www.lanbide.net web-orrian aurki daiteke.
Izena emateko epea: azaroaren 17an zabaldu zuten, eta abenduaren 1era bitartean egongo da.
Hemezortzi lanpostu hauek betetzeko garaian, udaletatik eta mankomunitatetik azaldu dutenez, «lehentasuna Aiztondo Mankomunitatea osatzen duten herrietan erroldatutakoek izango dute; hau da, Adunan, Alkizan, Larraulen eta Zizurkilen erroldatutakoek».

Amaiurren aldeko argazki herrikoia Asteasun

Tolosaldeko eta Leitzaldeko Hitza — Wed, 16 Nov 2011 08:36:21 +0000

Eskualdeko hainbat herritan bezala, Asteasun ere Amaiurren aldeko argazkia atera zuten hainbat herritarrek. Asteasuko kasuan, igande honetan elkartu ziren Amaiurren aldeko bozka eskatzeko.

Villabonako eta Asteasuko mendi taldeak prest euren asterako

Tolosaldeko eta Leitzaldeko Hitza — Wed, 16 Nov 2011 06:54:05 +0000

Asteasuko eta Villabonako mendi taldeek mendi asteak antolatu dituzte euren herrietan. Egitarauen barruan, hitzaldiak, proiekzioak eta nola ez, mendi irteerak aurkitzen dira.
Asteasuko Sagain Mendi Taldeak antolatu duen egitaraua gaur jarriko da martxan, 20:00etan, Alex Txikonen hitzaldiarekin. Mendi Astea antolatzerako garaian, udalaren babesa eta herritarren laguntza jaso dute Sagainekoek.
Lau egun igaroko dituen Mendi Astea jai herrikoi batekin amaituko dute asteasuarrek. Horregatik, igandea egun berezia izango da: 09:00etan plazan elkartu eta 4 ordu inguruko mendi ibilaldi erraza egingo dute, edozeinentzat aproposa. 09:30ean, mendi bizikletaz ibili nahi dutenek izango dute hitzordua plazan, 3 ordu inguruko mendi ibilaldia eginaz. Korrikalariek ere euren txokoa izango dute hilaren 20ko jaian. Hauek 10:00etan elkartuko dira plazan, 2 ordu t’erdiko lagun arteko ibilaldia egiteko asmoz. Goiza mendian pasa ondoren, guztiak irteera puntuan elkartuko dira, hau da, herriko plazan. Bertan jaia hasiko da, txerri erre dastaketa, edana, musika eta jolasekin.
Villabonan, Argazki Rallya
Aizkardi Mendi Elkarteak 28. Mendi Astea antolatu du Villabonan. Kasu honetan, hitzaldi eta mendi ibilaldiekin batera, IV. Argazki Rallya aipatu behar da: hilaren 21etik 24ra bitarte, lehiaketako argazkiak Gurea aretoan egongo dira ikusgai, eta sari banaketa ekitaldia hilaren 24ean, ostegunean izango da.
Hurrengo astelehenean hasiko den egitaraua, hilaren 27an amaituko da bazkari herrikoi batekin.
Aizkardiko kideek, Sagainekoek bezala, Mendi Asteko egitaraua osatzerako garaian, udalaren laguntza izan dute.

Egitarauak
Asteasu
Gaur, azaroak 16. Alex Txikonen proiekzio ikusgarria: Makalu mendebaldeko pilarra. Udaletxeko aretoan 20:00etan.
Etzi, azaroak 18. Aberto Zerainen proiekzioa: Kanchenjunga eta zortzimilakoak alpinar erara. Udaletxeko aretoan 20:00etan.
Azaroak 19, larunbata.
Orientazio duatloi proba. Oinez eta txirrinduz, adin eta maila guztientzat aproposa. Polikiroldegi aurrean 10:00etan.
Txirrindulari buelta familiarra Bizibidaiakoekin. Eguraldi ona eginez gero 16:00etan plazan. Edozeinentzat aproposa.
Proiekzioa Bizibidekoen eskutik, 17:30ean udaletxeko aretoan.
Azaroak 20, igandea.
Mendi irteera oinez. 4 ordu inguruko ibilbide erraza edozeinentzat aproposa. 09:00etan plazan.
Mendi txirrindaz 3 ordu inguruko ibilbidea, 09:30ean plazan.
Menditik korrika 2 ordu eta erdi inguruko ibilbidean. 10:00etan plazan.
Ondoren, herri festa plaza inguruan: txerri erre dastaketa, musika, jolasak…
Villabona
Azaroak 21, astelehena. Oskar Porrasen eskutik, Tibeteko altxorra. Gurea zine aretoan, 20:00etan.
Azaroak 22, asteartea.
Eskolentzako emanaldia 15:00etan, Chamonix-Saas Fee eskiz Egoitz Bengoetxearen eskutik.
Migel Mari Elosegiren eskutik, Yellowstone parke naturala. Gurea zine aretoan, 20:00etan.
Azaroak 23, asteazkena. Chamonix Zermatt-Saas Fee eskiz, Egoitz eta Gotzonen eskutik. Gurea zine aretoan, 20:00etan.
Azaroak 24, osteguna. Everesterako biderik laburrena Alberto Zerainen eskutik. Gurea zine aretoan, 20:00etan.
Azaroak 27, igandea. Mendi ibilaldia eta bazkaria. Irteera, Olaederra kiroldegian 08:00etan.

XIII. Donostiako Hiri Rallya Zizurkil eta Asteasutik pasa da

Tolosaldeko eta Leitzaldeko Hitza — Sat, 05 Nov 2011 17:54:51 +0000

Gaur arratsaldean XIII. Donostiako Hiri Rallya jokatu da. Irteera Zizurkilgo errepideetan hartu dute partaideek. Ondoren ibilbideak Asteasurantz eraman ditu. Eskualdeko herritar ugari elkartu da ibilbidean barrena, rallyko autoak ikusteko asmoz.