Villabona-Aiztondoko Hitza » Aduna

Helena Barquillaren bost erritmoen ikastaroan izena eman daiteke

Villabona-Aiztondoko Hitza — Mon, 06 Feb 2012 23:42:46 +0000

Asvinenea Arte Eszenikoen eskolak, bost erritmoen ikastaroa antolatu du. Hilaren 12an, igandean, eskainiko dute. Irakaslea Helena Barquilla izango da, eta ikastaroan txalapartariak zuzenean ariko dira.
Ikastaroa 10:00etan hasiko da, eta 18:00ak arte luzatuko da. Bost erritmoen ikastaroan izena eman nahi dutenek, ez dute zertan dantzaren ezagutza izan beharrik. Edonork parte hartu dezake.
Izena hilaren 8a, asteazkena, baino lehen ematen dutenek 50 euro ordaindu beharko dute, eta ondoren ematen duenak, berriz, 70 euro ordaindu beharko du.
Izena emateko, asvineneaeskola@gmail.com helbide elektronikora idatzi behar da, edo 692 949 209 (Helena) telefono zenbakira deituz ere eman daiteke.

Hiruhilabeteko afrikar dantza ikastaroa Asvinenean

Tolosaldeko eta Leitzaldeko Hitza — Fri, 03 Feb 2012 04:15:08 +0000

Asvineneak afrikar dantza ikastaroa antolatu du Adunan duten egoitzan. Hilaren 7an hasi da, eta hiru hilabete iragungo ditu. Marie Toure irakasle ginearrak astearteetan emango du ikastaroa, 19:00etatik 21:00etara, eta perkusioa zuzenean entzuteko eta jarraitzeko aukera egongo da. Izena emateko plaza mugatuak daudela azaldu dute Asvineneatik, eta erreserba egin nahi duenak laidall@hotmail.com helbidera bidali beharko du eskaria. Bazkideek 120 euro ordaindu beharko dute ikastaroa, eta ez direnek 135 euro. Informazio gehiagorako 691 62 66 06 telefono zenbakira deitu behar da.

Josu Amilibiak ordezkatuko du Arantza Aburuza Adunako alkatetzan

Tolosaldeko eta Leitzaldeko Hitza — Thu, 26 Jan 2012 05:51:58 +0000

Arantxa Aburuza alkate ohia eta Josu Amilibia alkate berria

Josu Amilibia da Adunako alkate berria, Arantza Aburuzak «arrazoi pertsonalak» medio kargua utzi ondoren. Alkate aldaketa atzo egin zuten, udalaren ohiko batzarrean, eta zinegotzi guztien adostasunarekin.
Arantza Aburuzak 2003an hartu zuen alkatetzaren ardura, herriko udal plataformaren buru aurkeztu eta gero. 2007ko udal hauteskundeetan, ANVren zerrendaburu bezala aurkeztu zen, eta karguarekin jarraitzeko adina babes jaso zuen herritarren aldetik. Hirugarren legealdirako, inongo zerrendetan ez joatea erabaki zuen Aburuzak. Herritarrek boto zuriaren aldeko aukera egin zutenez, aurreko udal taldeak jarraitu zuen udaletxean, aurreko alkatea buru zela. Atzo, zortzi urteko ibilbideari amaiera ematea erabaki zuen Arantza Aburuzak, nahiz eta zinegotzi bezala udal taldean jarraituko duen.
Kargu uztea aho batez onartu zuten gainontzeko udal hautetsiek. Josu Amilibiaren izendapena babesterakoan, adostasun bera azaldu zuten. Ondorioz, ondorengo lau urteetan Josu Amilibia izango da Adunako alkate berria.
«Adunako alkatea izatea ohore bat da, eta pertsonalki erronka garrantzitsua bat»; hauek izan ziren, kargua hartu ondorengo, Amilibiaren lehen hitzak. Aurreko alkateek ez diotela lan erraza utzi onartu zuen ondoren, «gaitasun handia erakutsi baitute», eta maila horretara iristen saiatuko dela esan zuen.
Herri bezala, hurrengo urteetan Adunak erronka potoloak dituela aipatu zuen, eta horiei gogotsu eta indartsu heltzeko asmoa zuela azaldu zien herritarrei: «Abiadura handiko trenaren afera, Erriberako poligonoa, hondakinen kudeaketa eta beste hainbat gai ditugu aurretik. Udal talde osoak bezala, nire indar guztia jarriko dut gai horien inguruan herriak duen ikuspuntua aurrera eramateko».
Arantza Aburuzak alkate kargua utzi arren, zinegotzi bezala laguntzeko prestutasuna eta konpromisoa azaldu zion, azkenik, Josu Amilibiari.

Josu Amilibia da Adunako alkate berria

Tolosaldeko eta Leitzaldeko Hitza — Tue, 24 Jan 2012 21:17:43 +0000

Arantxa Aburuzak agur esan dio Adunako alkatetzari, “arrazoi pertsonalengatik”. Hala eta guztiz ere, zinegotzi bezala eta alkate berriari laguntza ematen jarraituko duela azaldu du. Aburuzaren lekua Josu Amilibiak hartu du gaur iluntzean egin den udal batzarrean.

‘Kbaret’ ikuskizuna antolatu dute Asvinenean

Tolosaldeko eta Leitzaldeko Hitza — Tue, 24 Jan 2012 13:23:22 +0000

Asvinenean Kbaret ikuskizuna ikusteko aukera egongo da hilaren 27an, etzi, 22:00etatik aurrera. Emanaldia bost talderen lanez osatua egongo da: La Cigarra y el grillo, Moriarti Vinilo, Buluka, Badut eta Afrik&Blai izango direlarik Adunan. Afrikar dantzak, aire akrobaziak, clown-ak eta abarrek giroa ederki berotuko dutenez, eskualdeko herritarrei bertara joateko deia egin diete antolatzaileek.

Lagun bat larri zauritu da Adunan, bi autok talka eginda

Villabona-Aiztondoko Hitza — Wed, 18 Jan 2012 12:03:41 +0000

Adunan bi autoren arteko istripua izan da, eta lagun bat larri zaurituta eraman dute Donostiako Ospitalera.

Luzatze eta malgutasun ikastaroa antolatu dute, Asvinenean

Villabona-Aiztondoko Hitza — Wed, 04 Jan 2012 08:24:07 +0000

Asvinenea arte eszenikoen eskolak luzatze eta malgutasun ikastaroa antolatu du. Ane Miren izango da irakaslea, eta hilaren 21ean, larunbatean izango da.

Luzatze eta mantentze ikastaroa

Egun osoko saioa izango da, 10:00etatik 13:00etara, eta 16:00etatik 20:00etara. Ikastaroaren kostua 50 euro izango da, eta Asvineneako bazkide izanez gero, 45 euro ordaindu beharko da. Adin eta maila guztietako pertsonei zuzendutako ikastaroa prestatu dute. Norberak bere gorputza ezagutuko du, eta bakoitzak bere gaitasunaren arabera egingo ditu ariketak, Asvineneako arduradunek azaldutakoaren arabera.

Ikastaroa egiteko asvineneaeskola@gmail.com helbidera idatzi behar da, edota 665 738 081 telefono zenbakira deitu.
Antolatzaileek diotenez, hilean behin antolatu nahi dute.

Asvinenean zirko tailerra eta antzerki lehiaketa

Tolosaldeko eta Leitzaldeko Hitza — Tue, 27 Dec 2011 07:23:18 +0000

Asvineneak haurrentzako zirko tailerra antolatu du gaur, bihar eta etzi. Hiru egunetako tailerrean parte hartzeko 50 euro ordaindu behar dira. Ikastaroa 11:30etik 13:00etara izango da, Adunako Asvinenearen egoitzan. Informazio gehiagorako 689 79 24 69 edo
605 41 08 80 zenbakira deitu behar da. Bestalde, VI Poltsiko Antzerki Lehiaketan izena emateko epea zabalik dagoela gogorarazi dute, horretarako, poltsiko2012@gmail.com helbidera idatzi behar da, martxoaren 15a baino lehen.

VI. Poltsiko Antzerki Lehiaketan izena emateko aukerak zabalik jarraitzen du

Tolosaldeko eta Leitzaldeko Hitza — Wed, 07 Dec 2011 13:19:31 +0000

Asvineneako VI. Poltsiko Antzerki Lehiaketan parte hartu nahi duenak, izena emateko aukera zabalik dauka 2012ko martxoaren 15a bitarte. Horretarako Asvinenearekin jarri behar du harremanetan, 665 73 80 81 zenbakira deituta, edo poltsiko2012@gmail.com helbidera idatzita.
Lehiaketa hurrengo urteko apirilaren 20an hasi, eta ekainaren 1ean amaituko da.
Parte hartzaileek pieza motzak egin beharko dituzte, 8 minututik 15 minutu bitartekoak. Edozeinek hartu dezake parte, profesional zein amateurrek. Epaimahai profesional batek aukeratzen duen irabazleak, 1000 euroko saria jasoko du; publikoak aukeratzen duen pieza onenak 500 euroko saria izango du. Asvineneatik denei gerturatzeko eskatu die, leku berezi hau ezagutzeko.

Kontakt ikastaroa antolatu du Asvineneak, igandean

Villabona-Aiztondoko Hitza — Thu, 24 Nov 2011 11:34:09 +0000

Asvineneak Kontakt inprobisazio ikastaroa antolatu du, Sophie Dubsen eskutik. Ikastaroa hilaren 27an, etzi, izango da Adunako lokalean. Bi orduko ikastaroa izango da, 10:00etatik 14:00etarako. Parte hartu nahi duenak 35 euro ordaindu beharko ditu, eta bazkideek 30 euro. Informazio gehiago nahi duenak, 628 75 75 33 telefono zenbakira deitu beharko du, edo asvineneaeskola@gmail.com helbide elektronikora idatzi.