Arantxa Aburuza alkate ohia eta Josu Amilibia alkate berria

Josu Amilibia da Adunako alkate berria, Arantza Aburuzak «arrazoi pertsonalak» medio kargua utzi ondoren. Alkate aldaketa atzo egin zuten, udalaren ohiko batzarrean, eta zinegotzi guztien adostasunarekin.
Arantza Aburuzak 2003an hartu zuen alkatetzaren ardura, herriko udal plataformaren buru aurkeztu eta gero. 2007ko udal hauteskundeetan, ANVren zerrendaburu bezala aurkeztu zen, eta karguarekin jarraitzeko adina babes jaso zuen herritarren aldetik. Hirugarren legealdirako, inongo zerrendetan ez joatea erabaki zuen Aburuzak. Herritarrek boto zuriaren aldeko aukera egin zutenez, aurreko udal taldeak jarraitu zuen udaletxean, aurreko alkatea buru zela. Atzo, zortzi urteko ibilbideari amaiera ematea erabaki zuen Arantza Aburuzak, nahiz eta zinegotzi bezala udal taldean jarraituko duen.
Kargu uztea aho batez onartu zuten gainontzeko udal hautetsiek. Josu Amilibiaren izendapena babesterakoan, adostasun bera azaldu zuten. Ondorioz, ondorengo lau urteetan Josu Amilibia izango da Adunako alkate berria.
«Adunako alkatea izatea ohore bat da, eta pertsonalki erronka garrantzitsua bat»; hauek izan ziren, kargua hartu ondorengo, Amilibiaren lehen hitzak. Aurreko alkateek ez diotela lan erraza utzi onartu zuen ondoren, «gaitasun handia erakutsi baitute», eta maila horretara iristen saiatuko dela esan zuen.
Herri bezala, hurrengo urteetan Adunak erronka potoloak dituela aipatu zuen, eta horiei gogotsu eta indartsu heltzeko asmoa zuela azaldu zien herritarrei: «Abiadura handiko trenaren afera, Erriberako poligonoa, hondakinen kudeaketa eta beste hainbat gai ditugu aurretik. Udal talde osoak bezala, nire indar guztia jarriko dut gai horien inguruan herriak duen ikuspuntua aurrera eramateko».
Arantza Aburuzak alkate kargua utzi arren, zinegotzi bezala laguntzeko prestutasuna eta konpromisoa azaldu zion, azkenik,  Josu Amilibiari.